Poezi: Dashuruam ne !… dhe „Kundërshti „

Nga Petrit Malushi:Poezi

 

Dashuruam ne !…

Pa vërtitur celularë nëpër duar,  

Selfie pa dërguar, figurë e zë,         

Pa nisur mesazhe të koduar,

Foto pa përcjellë një pas një …         

Dashuruam ne !

 

Pa mbuluar gushë, gishta me bizhu,     

Mbi makina luksoze pa u krekosur, 

Pa veshje gjysmëlakuriq, ngjyrë dru,

Flokë e thonj pa i ylberuar e llakosur…

Dashuruam ne !

 

Pa qenë alkoolistë etjepashuar,

Duhanpirës a drogistë mendje “pa shteg”,

Pa shëtitur qen të çdo rrace rripshtrënguar,

Faqe e gjoks pa i fryrë si ajërbeg …

Dashuruam ne !

 

Ne, pa vaditur ëndërra qiellore

Të bukurën, pa zbukurime e kërkuam.

Ndjenjaçiltër fjalët zbraznim “në llogore”…

Shpirtkristal, zemërpranverë dashuruam !

„Kundërshti „

Të thjeshtat fjalë nuk u qasën

T’i lidhja në fjali, m‘u shpërhapën.

Të mirat nuk u bindën

T’i bëja vargje, m‘u larguan.

 

Të bukurat nuk u joshën

T’i thurja strofa, m‘u shëmtuan.

Të ëmblat nuk pranuan

T’ë ndërtoja vjersha, m‘u hidhëruan.

 

Për bëmat dhe emrat tuaj epidemikë:

Mashtrues, hipokrit, servil, korruptues…

Nuk dëshironin të bëheshin shtrat puplor

Dhe strehëz me dega dafine !