Publikohet botimi i tretë nga autorja Liber Emini nga Kumanova

Autorja Liber Emini ka prezantuar librin e saj të ri, “ATJE, PËRTEJ SË VËRTETËS…”, një përmbledhje socio-filozofike që përfshin tema të ndryshme, duke synuar të sjellë një pasqyrim gjithëpërfshirës të përplasjeve të jetës. Në vend të një fokusi të veçantë, ky libër eksploron një mori tematikash që ndërthuren në formën e poezisë, ndryshe nga librat e saj të mëparshëm, të shkruar në prozë.

“Inspirimi për këtë libër erdhi si përgjigje ndaj kërkesës së lexuesve për një tjetër vepër, këtë herë në poezi,” shprehet Emini. “Libri u shkrua në mënyrë të heshtur, pa njoftuar askënd, sepse më ka pëlqyer që suksesi im të flasë për mua, më shumë se unë vetë.”

Autorja shpreh mirënjohje të veçantë për prindërit e saj, për babain dhe nënën tashmë të ndjerë, të cilët e kanë mbështetur gjatë gjithë rrugëtimit të saj, si dhe për miqtë dhe rrethin e ngushtë që kanë dhënë mbështetje morale në çdo hap.

Përmbledhja shpresohet të frymëzojë të rinjtë vizionarë që nuk njohin dorëzim, duke u bërë një thirrje për të ndjekur ëndrrat dhe për t’i dhënë jetë ideve të tyre përmes shkrimit.